ܕܝܪܐ ܕܟܘܪܟܡܐ܆ ܚܕܐ ܗ̱ܝ ܡܼܢ ܕܝܪ̈ܬܐ ܥܬܝܼܩ̈ܬܐ ܘܪ̈ܝܼܫܳܝܳܬܐ ܕܣܘܪ̈ܝܝܐ. ܕܩܳܝܡܐ ܙܓܘܼܪܝܐ ܒܐܦ̈ܝ ܕܪ̈ܐ ܘܫܪ̈ܒܬܐ ܒܚܘܼ̈ܟܳܡܐ ܕܰܡܣܰܟܡܝܼܢ ܘܡܬܰܩܢܝܢ ܒܟܐܦ̈ܐ ܕܪܘܚܳܢܳܝܘܼܬܐ ܚܕܐ ܕܢܳܒܥܐ ܘܒܳܠܨܐ ܡܼܢ ܨܡܚ̈ܐ ܒܟܝܼܪ̈ܝܐ ܕܝܘܒܠܐ ܣܘܼܪܝܝܐ ܡܫܝܼܚܳܝܐ܆ ܗܿܘ ܕܣܪܝܼܕܐ ܕܫܪ̈ܫܘܗܝ ܘܫܪ̈ܒܘܗܝ ܢܨܝܼ̈ܚܐ ܡܫܬܟܚܝܼܢ ܒܐܬܪܐ ܕܛܘܪܥܒܕܝܢ. ܗܢܐ ܕܥܳܦܐ ܐܝܩܪܐ ܘܫܘܼܒܚܐ ܕܥܠܡܐ ܣܦܝܼܪܐ ܘܢܗܝܼܪܐ.

ܕܝܪܐ ܗܕܐ܆ ܕܣܳܒܠܐ ܗܿܢܘܢ ܕܐܬܡܠܝ ܠܗܠܝܢ ܕܝܘܡܢܐ܆ ܒܰܢܝܐ ܒܕܪܐ ܚܡܝܫܝܐ ܥܠ ܥܩܒ̈ܬܐ ܕܒܝܬ ܦܬܟܪ̈ܐ܆ ܒܫܦܘܠܐ ܫܠܝܼܛܐ ܕܒܰܥܝܕ ܡܼܢ ܡܪܕܐ ܡܕܝܢ̱ܬܐ ܚܡܫܐ ܟܝܠܘܡܬܪ̈ܐ. ܘܥܡ ܝܘܼܒܳܠܗܿ ܥܬܝܩܐ܆ ܠܐ ܫܳܬܩܐ ܐܦ ܡܼܢ ܗܿܝ ܕܬܓܠܘܚ ܫܘܦܪܗܿ ܦܫܝܼܛܐܿ ܘܦܪܝܣܐ. ܘܡܘܼܙܓܐ ܪܟܝܟܐ ܘܦܰܝܘܼܓܐ ܕܢܳܛܦ ܘܡܙܕܠܚ ܡܼܢ ܐܰܣܝܼܢ̈ܬܐ ܪ̈ܘܚܢܝܬܐ ܘܡܪ̈ܕܘܬܢܝܬܐ ܘܐܰܡܢܳܝ̈ܬܐ ܕܐܣܝ̈ܗܿ܆ ܠܘ ܒܠܚܘܕ ܓܳܪܫ ܘܢܳܬܦ ܒܪܢܫܐ ܠܘܬ ܨܰܘܒܐ ܕܐܝܢܳܝܘܬܗܿ ܪܘܼܚܳܢܳܝܬܐ܆ ܐܠܐ ܐܦ ܡܰܩܢܐ ܫܘܼܓܢܳܝܐ ܓܰܘܳܝܐ ܒܰܡܠܰܚܡܘܼܬܐ ܚܕܐ ܕܕܡܣܐ ܠܗ ܒܗܠܝܢ ܕܚܝ̈ܐ. ܘܢܳܨܚܐ ܒܡܰܩܠܢܘܼܬ ܪܗܛܗܿ ܫܒܝܼܚܐ ܘܬܫܡܫܬܗܿ ܥܡܝܼܠܬܐ ܕܠܐܦ̈ܝ ܝܘܠܦܢܐ ܡܫܝܚܝܐ ܘܡܪܕܘܬܐ ܐ̱ܢܫܝܬܐ. ܘܕܪܐ ܬܫܝܼܥܳܝܐ ܘܰܥܣܝܼܪܝܐ ܕܪ̈ܝܗܿ ܕܗܒ̈ܢܝܐ ܚܫܝܼܒܝܼܢ. ܕܒܝܬ ܣܦܪܗܿ ܥܠܝܐ ܛܒܝܼܒ ܗ̱ܘܐ ܗܝܕܝܟ ܒܗܠܝܢ ܕܐܠܗ̈ܝܬܐ ܘܡܠܝܼܠܘܬܐ ܘܫܪܟܐ ܕܝܕ̈ܥܬܐ ܟܝܢ̈ܝܬܐ.

ܘܒܥܒܪܐ ܕܛܰܘܪܐ ܡܟܬܒܙܒܢܝܐ ܩܰܪܒܰܬ ܠܥܕܬܐ ܥܣܪܝܢ ܘܚܕ ܦܛܪܝܪ̈ܟܐ ܘܬܫܥܐ ܡܦܪ̈ܝܢܐ ܘܡܐܐ ܥܣܪܝܢ ܐܦܣܩܘ̈ܦܐ ܘܥܡ ܡܐܘ̈ܬܐ ܕܕܝܪ̈ܝܐ ܘܩܫܝܼ̈ܫܐ ܘܡ̈ܠܦܢܐ ܒܚܝܼܪ̈ܐ. ܘܥܳܒܕܳܐ faktör ܪܝܫܳܝܐ ܕܰܫܒܼܰܩ ܕܢܗܘܐ ܠܗܿ ܝܼܨܝܼܦܘܼܬܐ ܘܡܥܒܕܢܘܼܬܐ ܪܒܬܐ ܒܚܝ̈ܐ ܕܣܘܪ̈ܝܝܐ܆ ܠܝܬܘܗܝ ܐܠܐ ܐܢ ܗܿܝ ܕܫܬܡܐܐ ܘܐܪܒܥܝܢ ܫܢܝܼ̈ܢ ܫܰܡܫܰܬ ܟܘܪܣܝܐ ܫܠܝܼܚܳܝܐ ܕܐܢܛܝܘܟܝܐ ܥܕܡܐ ܠܫܢܬ 1932.

ܦܛܪܝܪܟܐ ܐ̱ܚܪܝܐ ܕܦܫ ܘܫܰܡܫ ܒܡܪܕܐ ܘܕܝܪܐ ܕܟܘܪܟܡܐ ܗܘܝܘ ܬܠܝܬܝ ܛܘ̈ܒܐ ܡܪܝ ܐܝܓܢܐܛܝܘܣ ܐܠܝܐܣ ܬܠܝܬܝܐ. ܗܢܐ ܕܒܫܢܬ 1931 ܐܙܠ ܠܗܢܕܘ ܠܡܚܝܕܘ ܠܦ̈ܠܝܼܓܐ ܕܥܕܬܐ ܘܠܡܫܝܢܘ ܚܪܝܢܗܘܢ ܘܡܘܼܪܡܳܪܗܘܢ ܠܬܰܪܥܘܼܬܐ ܘܫܠܡܐ. ܐܠܐ 13ܫܒܛ ܫܢܬ 1932 ܡܫܬܢܐ ܠܥܠܡ ܥܠܡܝܢܳܝܘܬܐ ܒܫܟܬ ܠܒܐ. ܘܡܛܠܗܕܐ ܒܬܪܟܢ ܝܘܡܐ ܗܢܐ ܐܬܩܒܠ ܘܰܗܘܐ ܝܘܡܐ ܕܕܘܟܪܢܐ ܕܦܛܪܝܪܟܐ ܐܠܝܐܣ ܒܗܢܕܘ.

ܟܠ ܫܢ̱ܬܐ ܚܕ ܡܼܢ ܚܣܝ̈ܐ ܡܬܪܝܫܢ ܥܘܼܕܥ̈ܕܐ ܘܚܘܼ̈ܓܳܝܐ ܪ̈ܒܐ ܕܡܬܥܒܕܝܢ ܒܗܢܕܘ ܠܕܘܟܪܢܐ ܕܝܘܡܐ ܗܢܐ. ܗܕܐ ܕܝܢ ܒܝܕ ܦܘܩܕܢܐ ܫܠܝܚܝܐ ܕܡܪܢ ܦܛܪܝܪܟܐ. ܫܒܛ 2006 ܬܫܡܫܬܐ ܕܪܝܫܢܘܬܐ ܗܕܐ ܐܬܝܗܒܰܬ ܗ̱ܘܬ ܠܢ ܚܣܝܘܼܬܐ ܕܣܘܼܪ̈ܝܝܐ ܕܡܪܕܐ.

ܒܣܘܼ̈ܟܠܐ ܛܒ̈ܐ ܘܛܒܝܼ̈ܥܘܳܬܐ ܙܢܢܝ̈ܬܐ ܐܫܬܡܠܝܬ݀ ܣܥܘܪܘܬܢ ܕܗܢܕܘ ܗܕܐ ܕܫܪܝܬ݀ 9 ܫܒܛ ܘܫܠܡܬ݀ 20 ܫܒܛ 2006 ܒܪܝܫܢܘܬܗ ܕܚܣܝܘܬܗ ܕܡܝܛܪܦܘܠܝܛܐ ܕܝܠܢ ܐܒܘܢ ܡܥܠܝܐ ܡܪܝ ܦܝܠܘܟܣܝܢܘܣ ܨܠܝܒܐ ܐܙܡܢ. ܘܫܟܝ̣ܚܝܢ ܗ̱ܘܘ ܒܠܘܝܬܢ ܡ̣ܢ ܡܪܥܝܬܐ ܕܡܪܕܐ ܪܒܢ ܓܒܪܐܝܠ ܐܩܩܘܪܛ ܚܕ ܡܼܢ ܕܝܪ̈ܝܐ ܕܕܝܪܐ ܕܟܘܪܟܡܐ. ܘܐܢܿܐ ܡܠܦܢܐ ܝܘܣܦ ܒܶܓܬܰܫ ܢܛܪ ܐ̱ܪܙܐ ܓܘܢܝܐ ܕܚܣܝܘܬܐ. ܘܨܘܦܚܝ̣ ܓܘܠ ܘܡܘܪܕ ܐܳܙܒܰܪܟ ܗܕ̈ܡܐ ܕܡܘܬܒܐ ܥܕܬܢܝܐ ܕܡܪܕܐ. ܘܣܥܝܕ ܨܘܨܝܢ ܘܒܪܬ ܙܘܓܗ ܘܥܡܢܘܐܝܠ ܥܰܒܰܔܺܝ ܘܒܪܬ ܙܘܓܗ ܡ̣ܢ ܡܘܬܒܐ ܥܕܬܢܝܐ ܕܐܤܛܢܒܘܠ.

 ܣܥܘܪܘܬܢ ܩܰܢܝܐ ܗ̱ܘܬ ܕܝܼܠܳܝ̈ܬܐ ܦܪ̈ܝܼܫܬܐ ܘܒܳܪܝܐ ܪ̈ܓܫܐ ܡܫܚ̈ܠܦܐ ܘܡܝܬܝܐ ܗ̱ܘܬ ܣܓܝ̈ܐܬܐ ܠܒܳܠܐ. ܘܦܐܚ ܗ̱ܘܐ ܘܡܬܬܣܝܼܩ ܡܢܗܿ ܪܝܚܐ ܕܕܝܪܐ ܕܟܘܪܟܡܐ ܘܡܪܕܐ: ܒܝܬ ܝܠܕܐ ܘܡܩܡܐ ܕܡܢܚܐ ܦܛܪܝܪܟܐ ܐܠܝܐܣ. ܐܠܐ ܒܝ ܐܢܐ ܓܳܠܝܐ ܗ̱ܘܬ ܪܝܼܚܐ ܕܡܥܒ̈ܕܢܘܬܐ ܒܰܪ̈ܝܳܬܐ ܘܟܰܣ̈ܝܳܬܐ ܕܰܫܒܼܩܘ ܐܒܗ̈ܬܐ ܣܘܪ̈ܝܝܐ ܒܐܬܪܐ ܕܚܝܼܠܐ ܕܗܢܕ̈ܘܝܐ. ܗܿܘ ܕܒܗ ܦܫܰܚ ܗ̱ܘܐ ܒܙܒܢ ܐܪܝܐ ܝܡܝܢܐ ܕܫܳܩܝܐ ܕܡܚܝܗܝ ܗ̱ܘܐ ܠܡܪܝ ܬܐܘܡܐ ܫܠܝܚܐ.

ܘܒܫܘܪܝ ܕܘܟܪܢܐ ܡܐܘ̈ܬܐ ܕܡܗܝ̈ܡܢܐ ܡܢ ܒܘܼ̈ܥܕܐ ܪ̈ܚܝܼܩܐ ܕܐܪܒܥܡܐܐ ܘܚܡܫܡܐܐ ܟܝܠܘܡܬܪ̈ܐ ܛܘܼ̈ܠܩܝܢ ܛܘܼ̈ܠܩܝܢ ܘܟܢ̈ܫܝܼܢ ܟܢܫܝܼ̈ܢ ܩܳܕܡܝܼܢ ܒܪܓܠ (ܡܢܗܘܢ ܡܿܢ ܚܦܝܐܝܬ) ܠܕܝܪܐ ܕܡܪܝ ܐܝܓܢܐܛܝܘܣ ܗܿܝ ܕܒܗܿ ܩܒܝܼܪ ܡܢܚ ܢܦܫܐ ܦܛܪܝܪܟܐ ܐܠܝܐܣ. ܐܦܢ ܠܐ ܐܬܡܨܝܬ ܠܡܐܠܦ ܪ̈ܦܬܐ ܕܚܘܼܫܳܒ̈ܝܗܘܢ ܘܰܚܫܝ̈ܫܘܳܬܐ ܕܪ̈ܘܼܚܬܗܘܢ ܘܪܘܼܦܪ̈ܳܦܐ ܕܙܰܘܥܝ̈ܗܘܢ܆ ܐܠܐ ܒܪܡ ܠܐ ܥܣܩܐ ܠܡܣܬܟܠܘ ܗܝܡܢܘܬܐ ܗܿܝ ܕܡܙܝܥܐ ܗ̱ܘܬ ܚܝܠܐ ܒܒܘܪ̈ܟܝܗܘܢ ܘܐܩ̈ܠܝܗܘܢ ܕܠܐ ܢܬܪܦܘܢ ܡܼܢ ܗܠܟܐ ܬܟܝܼܒܐ.

ܟܕ ܓܝܪ ܟܳܪܟ ܒܪܢܫܐ ܥܕܬܐ ܣܘܪܝܝܬܐ ܕܗܢܕܘ܆ ܩܪܝܼܚܐܝܬ ܡܬܚܙܝܐ ܐܝܬܘܬܐ ܕܐܣܪ̈ܐ ܡܟܬܒܙ̈ܒܢܝܐ. ܘܠܒܐ ܕܐܣܪ̈ܐ ܗܠܝܢ ܚܣܝ̈ܐ ܘܡܦܪ̈ܝܢܐ ܘܦܛܪܝܪ̈ܟܐ ܐܢܘܢ (ܘܫܪܟܐ ܕܪ̈ܘܚܢܝܐ) ܕܢܰܩܝܘ ܩܢܘܡܗܘܢ ܥܠ ܐܦ̈ܝ ܫܘܘܫܛܐ ܘܗܘܼܒܒܐ ܕܥܕܬܐ. ܘܡܬܚܓܐ ܘܡܬܥܕܥܕ ܕܘܟܪܢܗܘܢ ܠܫܘܼܒܚܐ ܕܫܡܗ ܕܡܪܝܐ ܒܗܝ̈ܟܠܐ ܕܒܢܝܢ ܒܫܡܗ̈ܝܗܘܢ ܡܛܠ ܐܝܩܪܗܘܢ ܪܘܚܢܝܐ. ܘܠܐ ܟܣܝܐ ܡܼܢ ܦܪ̈ܘܫܐ ܕܠܡ ܩܢܘ̈ܡܐ ܗܠܝܢ ܠܘ ܒܠܚܘܕ ܕܘܡܝܐ ܘܛܘܦܣܐ ܛܒܐ ܗܘܼܘ܆ ܐܠܐ ܐܦ ܫܓܰܪܘ ܘܐܪܕܝܘ ܕܡܐ ܛܒܐ ܒܓܝ̈ܕܐ ܘܫܪ̈ܝܢܐ ܕܥܕܬܐ ܕܗܢܕܘ. ܥܠܗܕܐ ܛܒ ܣܳܘܚ ܗ̱ܘܝܬ ܠܡܣܬܟܠܘ ܢܣܝ̈ܢܐ ܗܰܘܢ̈ܢܳܝܐ ܘܪ̈ܘܚܢܝܐ ܕܐܒܗ̈ܬܐ ܗܿܢܘܢ. ܕܚܘܒܗܘܢ ܡܫܝܼܚܳܝܐ ܨܠܝܼܠܐ ܘܫܦܝܼܥܐ ܗܿܘܐ ܗ̱ܘܐ ܥܘܬܕܐ ܡܬܬܙܝ̣ܥܢܐ ܕܝܳܗܒ ܠܝ ܚܝܠܐ ܚܣܝ̣ܢܐ ܠܡܙܟܐ ܬܥ̈ܫܐ ܘܫܚ̈ܩܐ ܕܣܥܘܪܘ̣ܬܐ. ܕܒܠܥܕܘܗܝ ܠܐ ܡܨܝܐ ܗ̱ܘܬ ܕܐܩܘ̣ܡ ܒܬܫܡ̈ܫܬܐ ܕܙܕ̈ܩܢ. ܠܙ̈ܬܐ ܘܠܐܘ̈ܬܐ ܕܐܤܬܩܒܠܢܢ ܠܝܬܝܗܝܢ ܡܕܡ ܒܦܚܡܐ ܕܠܘܬ ܚܘܼܕܬܐ ܘܠܘ̣ܒܒܐ ܪܘܚܢܝܐ ܕܩܢܝܢܢ ܡܼܢ ܣܥܘܪܘ̣ܬܐ ܗܕܐ ܕܣܓܝ̈ܐܬܐ ܡܕܝܼܠܐ ܒܚܘܼ̈ܫܒܐ. ܘܟܕ ܠܐ ܡܬܬܟܣ ܚܐܦܗ̇܆ ܗܝ̣ ܡܠܬܐ ܒܳܥܝܳܐ ܕܬܒܩܘ̣ܪ ܘܬܓܠܐ ܡܬܕܝ̈ܠܢܝܬܗܿ. ܒܪܡ ܙܒܢܐ ܘܕܘ̣ܟܬܐ ܙܳܓܪܝܢ ܘܟܳܠܝܢ. ܘܗܿܝ ܕܫܪܝܪܐ܆ ܠܐ ܝܳܕܥ ܐ̱ܢܐ ܒܐܝܠܝܢ ܩܘܳܝ̈ܐ ܐܙܩܘܪ ܡ̈ܠܝ. ܐܠܐ ܚܕܐ ܝܳܕܥ ܐ̱ܢܐ ܟܠ ܡܐ ܕܟܬܒ ܐ̱ܢܐ܆ ܙܕܩ ܕܢܬܒܝܬܐ ܠܗܠܝܢ ܕܓܰܘ̈ܝܐ ܥܳܒܕܝܼܢ ܠܢ ܥܡ ܡܪܕܘܼܬܢ ܘܣܦܪܝܘܼܬܢ ܟܢܘܼܫܝܝܬܐ ܘܪܘܼܚܢܝܬܐ.

ܫܘܼܠܛܢܐ ܕܝܰܪܘܩܘܬܐ ܪܒܐ ܡܬܚܙܐ ܗ̱ܘܐ. ܥܕܡܐ ܠܗܝ ܕܒܙܒܢ ܚܳܫܒ ܗ̱ܘܝܬ ܕܩܐܡ ܐ̱ܢܐ ܠܝ ܒܚܦܪܐ ܡܕܡ ܥܰܡܝܼܩܐ ܕܛܡܝܼܪ ܒܰܣܚ̈ܦܐ ܕܐܪܥܐ. ܘܟܕ ܪܕܝܢ ܗ̱ܘܝܢ ܒܐܘܪ̈ܚܬܐ ܣܒܝܼ̈ܣܬ ܥܩܘ̈ܠܐ ܕܰܡܟ̈ܣܝܢ ܒܐܝ̈ܠܢܐ ܥܰܒܝ̈ܛܐ܆ ܪܢܐ ܘܗܳܕܣ ܗ̱ܘܝܬ ܬܰܘܓܳܢܐܝܬ ܒܕܘܘ̈ܕܐ ܘܰܫܚܘܼ̈ܩܝܐ ܘܛܘܼܪ̈ܦܐ ܕܐܣܬܩܒܠܘ ܐܒܗ̈ܬܐ ܗܿܢܘܢ ܣܘܪ̈ܝܝܐ ܒܝܬܢܗܪ̈ܝܢܝܐ ܒܐܬܪܐ ܕܗܢܕܘ ܗܢܐ ܕܒܙܒܢ ܣܓܝ ܕܚܝܼܠܐ ܡܬܚܙܐ. ܘܟܡܐ ܕܗܳܕܣ ܗ̱ܘܝܬ ܝܬܝܪ ܪܳܓܫ ܘܚܐܫ ܗ̱ܘܝܬ. ܘܐܝܟ ܦܝܠܡܐ ܡܬܬܨܝܼܪ̈ܢ ܗ̱ܘ̈ܝ ܩܕܡ ܥܝ̈ܢܝ ܥܣܩ̈ܬܐ ܘܡܥܝܼ̈ܣܬܐ ܕܣܒܼܠܘ ܥܠ ܐܦ̈ܝ ܥܕܬܐ ܘܗܝܡܢܘܬܐ. ܥܠܗܕܐ ܟܠ ܟܪ ܕܐܙܠܬ ܘܛܦܶܬ܆ ܪܘܚܝ ܛܳܝܪܐ ܗ̱ܘܬ ܠܕܪ̈ܐ ܥܒܝܼܪ̈ܐ. ܘܗܘܢܝ ܘܡܕܥܝ ܠܙܒܢܐ ܕܥܬܝܕ. ܘܟܬܝܼܒ̈ܬܐ ܣܘܪ̈ܝܝܬܐ ܕܡܬܚ̈ܙܝܢ ܗ̱ܘ̈ܝ ܒܓܘ̈ܕܐ ܕܡܢܗܝܢ ܕܥܕ̈ܬܐ ܘܙܥ̈ܩܢ ܛܢܢܐ ܕܐܒܗ̈ܬܐ ܛܘܪ̈ܥܒܕܝܢܝܐ ܗܳܘ̈ܝܳܢ ܗ̱ܘ̈ܝ ܠܝ ܩܘܼܪܬ ܪܘܼܚܐ ܘܒܘܝܐܐ.                            

ܚܝ̈ܐ ܟܢܘܼ̈ܫܝܳܝܐ ܐܝܟ ܨܘܨ̈ܝܬܐ ܓܕܝܼܠܝܼܢ ܒܚ̈ܕܕܐ. ܘܥܡ ܗܕܐ ܡܘ̣ܙܓܐ ܟܢܘ̣ܫܝܝܐ ܘܚܝ̈ܐ ܡܫܘ̈ܬܦܐ ܪ̈ܟܝ̣ܟܐ ܘܢܝܼ̈ܚܐ ܡܬܚܙܝܢ ܒܕܘܒܪ̈ܝܗܘܢ ܘܒܣܘܥܪ̈ܢܝܗܘܢ. ܘܪܡܝܼܣܘܼܬܐ ܘܒܰܣܝܼܡܘܼܬܐ ܕܒܝܢܬ ܣܕܪ̈ܐ ܐ̱ܢܫ̈ܝܐ ܘܰܟܢܘܼܫ̈ܝܝܐ ܢܳܓܕܐ ܚܰܘܪܐ. ܘܕܚ̈ܫܐ ܠܐ ܡܬܚܙܝܢ ܐܠܐ ܐܢ ܕܰܠܝܼܠܐܝܬ ܒܢܘܼ̈ܩܙܬܐ ܦܪ̈ܝܼܫܳܬܐ. ܗܕܐ ܕܝܢ ܪܡܙܐ ܠܪܟܝܼܟܘܬܐ ܗܿܝ ܕܡܬܬܪܣܝܐ ܘܡܣܬܝܒܪܐ ܡܼܢ ܡܒܘܼ̈ܥܐ ܡܫܚ̈ܠܦܐ ܕܗܝܡܢܘܬܐ ܗܢܕܘܳܝܬܐ ܘܡܫܠܡܳܢܳܝܬܐ ܘܡܫܝܼܚܳܝܬܐ. ܐܠܐ ܗܿܝ ܕܫܪܝܪܐ ܠܒܝ ܡܣܬܝܛ ܘܡܫܬܦܕ ܟܠ ܟܡܐ ܕܕܳܟܪ ܐ̱ܢܐ ܒܢܝ̈ܢܫܐ ܗܿܢܘܢ ܦܫܝܼ̈ܓܐ ܘܰܚܓܝܼ̈ܣܐ ܘܚܓܝܼܪ̈ܐ ܘܰܡܫܰܪ̈ܝܐ ܕܪܡܝܢ ܗ̱ܘܘ ܥܠ ܝܕ ܐܘܪ̈ܚܬܐ. ܡܼܢ ܓܒܐ ܡܿܢ ܣܰܒܝܼܟܘܬܗܘܢ ܚܠܝܼܨܬܐ ܒܗܠܝܢ ܕܚ̈ܝܐ ܫܳܘܝܐ ܗ̱ܝ ܠܩܘܼܠܣܐ܆ ܘܡܢ ܓܒܐ ܐ̱ܚܪܢܐ ܕܝܢ ܙܳܡܪܐ ܘܙܳܥܩܐ ܗܰܦܟܝ̈ܬܐ ܢܳܨܘ̈ܦܳܬܐ ܒܐܕ̈ܢܐ ܥܪ̈ܝܼܡܬܐ.

ܨܰܚ ܣܒܪܢ ܘܥܫܢ ܚܘܒܢ ܘܪܦܬܘ ܣܘܼ̈ܟܝܝܢ ܒܣܥܘܪܘܬܐ ܕܠܩܠܝ̣ܪܝܩܝܬܐ. ܕܒܗܿ ܐܒܘܢ ܚܣܝܐ ܬܢܝ ܠܝ̈ܠܘܦܐ ܩܠܝܪ̈ܝܩܝܐ ܐܠܨܝܘܬܐ ܕܠܫܢܐ ܣܘܪܝܝܐ. ܘܡܥܒܕܢܘ̣ܬܐ ܕܕܝܪܐ ܕܟܘܪܟܡܐ ܒܚ̈ܝܐ ܕܡܪܕܘܬܐ ܣܘܪܝܝܬܐ. ܘܚܕܝܢܢ ܒܣܥܘܪܘܬܐ ܕܡܪܥܝܬܐ ܕܟܢܥܢ̈ܝܐ ܘܡܪܥܝ̣ܬܐ ܕܚܣܝܐ ܡܪܝ ܝܘܠܝܘܣ. ܘܚܡܫܐ ܩܘܪ̈ܒܐ ܐܠܗ̈ܝܐ ܐܩܝܡܢܢ ܒܥܕ̈ܬܐ ܡܫܚ̈ܠܦܬܐ. ܘܥܡܐ ܡ̣ܢ ܟܠ ܩܘ̈ܡܢ ܘܡܘ̣ܫ̈ܚܢ ܡܬܛܝܒ ܗ̱ܘܐ ܒܩܘܪ̈ܒܐ ܗܠܝܢ ܘܫܪܟܐ ܕܚܓ̈ܐ ܪ̈ܘܚܢܝܐ. ܘܕܝܠܢܐܝܬ ܕܘܟܪܢܐ ܘܫܗܪܐ ܕܕܝܪܐ ܕܡܪܝ ܐܝܓܢܐܛܝܘܣ ܐܠܝܐܣ ܬܠܝܬܝܐ܆ ܡܬܡܗܢܐ ܗ̱ܘ ܒܕܝ̈ܠܝܬܗ ܗ̇ܢܝܢ ܕܥܠ̈ܒܳܢ ܟܠܗܘ̇ܢ ܫܗܪ̈ܐ ܘܕܘܟܪ̈ܢܐ. ܘܒܪܢܫܐ ܡܪܓܫ ܕܠܡ ܥܝܪܘ̣ܬܐ ܗܰܘܢܳܢܳܝܬܐ ܘܰܡܛܝܒܘ̣ܬܐ ܠܒܳܢܳܝܬܐ ܕܫܟܝ̣ܚܐ ܨܳܒܝܐ ܠܡܩܒܠܘ̣ ܡܠ̈ܟܐ ܘܪ̈ܬܝܐ ܪ̈ܘܚܢܝܐ. ܥܠܗ̇ܕܐ ܟܠ ܟܪ ܕܡܫܬܟܚܝܼܢ ܘܡܬܛܝܒܝܼܢ ܗ̱ܘܝܢ ܚܣܝܘܬܗ ܕܡܪܝ ܦܝܠܘܟܣܝܢܘܣ ܨܠܝܒܐ ܐܝܙܓܕܐ ܦܛܪܝܪܟܝܐ ܦܳܫܛ ܘܡܩܪܒ ܗ̱ܘܐ ܨܠܘ̈ܬܐ ܘܒܘܪ̈ܟܬܐ ܘܚܘܒܐ ܕܩܕܝܫܘܬܗ ܕܡܪܢ ܡܪܝ ܐܝܓܢܐܛܝܘܣ ܙܟܝ ܩܕܡܝܐ ܠܡܗܝ̈ܡܢܐ ܘܠܩܠܝܪܘܣ ܥܕܬܢܳܝܐ. ܘܡܰܫܡܰܥ ܗ̱ܘܐ ܐܠܨܝܘܬܐ ܕܐܣܪ̈ܝܗܘܢ ܕܥܡ ܟܘܪܣܝܐ ܫܠܝ̣ܚܝܐ ܕܐܢܛܝܘܟܝܐ. ܘܒܬܘܕܝܬܐ ܘܐܝܩܪܐ ܟܳܪܙ ܗ̱ܘܐ ܒܛܝ̣ܠܘܬܐ ܡܥܰܦܩܢܝܼܬܐ ܘܚܰܝܘܣܬܢܝ̣ܬܐ ܕܡܪܢ ܦܛܪܝܪܟܐ ܗ̇ܝ ܕܓܳܒܠܐ ܡܨ̈ܥܝܐ ܘܦܘܪ̈ܣܐ ܛܒ̈ܐ ܡܛܠ ܡܘܼܠܝܐ ܕܣܢܝܼ̈ܩܘܬܐ ܦܘܪ̈ܢܳܣܳܝܳܬܐ ܕܡܫܬܟ̈ܚܢ ܒܥܕܬܐ ܓܘܢܐܝܬ ܘܗ̇ܝ ܕܗܢܕܘ ܕܝܠܢܐܝܬ. ܘܡܘܕܥ ܗ̱ܘܐ ܕܠܡ ܡܕܒܪܢܘܬܐ ܚܟܝܡܬܐ ܕܡܪܢ ܦܛܪܝܪܟܐ ܪܡܝܐ ܗ̱ܝ ܒܟܠܙܒܢ ܠܝܘܬܪ̈ܢܐ ܕܐ̱ܚܪ̈ܢܐ܆ ܘܝܳܨܦܐ ܘܐܟܦܐ ܛܢܢܐܝܬ ܕܣܘ̣ܥܪ̈ܢܐ ܕܥܕܬܐ ܕܗܢܕܘ. ܘܟܕ ܡܬܚܦܛ ܘܡܬܠܒܒ ܗ̱ܘܐ ܡܼܢ ܗܠܝܢ ܕܡܪܕܘܬܐ ܣܘܪܝܝܬܐ܆ ܡܩܪܚ ܘܐܡܿܪ ܗ̱ܘܐ: ܐܝܟ ܥܕܬܐ ܙܳܕܩ ܕܢܐܨܦ ܕܡܢܚܡܢܘ̣ܬ ܠܫܢܐ ܣܘܪܝܝܐ. ܒܕ ܒܫܪܪܐ ܠܐ ܡܨܝܐ ܕܢܬܬܣܝܡ ܬܚܦܝܬܐ ܕܫܬܩܐ ܥܠ ܒܨܝܼܪܘܬܐ ܗ̇ܕܐ ܕܡܓܗܪܐ ܥܝ̈ܢܐ ܬܡܢ ܒܗܢܕܘ.

ܩܘܼ̈ܒܳܠܐ ܘܙܰܘܚ̈ܐ ܐܒܗ̈ܝܐ ܕܡܬܥܒܕܝܢ ܗ̱ܘܘ ܠܐܒܘܢ ܚܣܝܐ ܒܥܕ̈ܬܐ ܡܥܙ̈ܙܢܐ ܘܡܚܣ̈ܢܢܐ ܗ̱ܘܘ. ܘܫܘܝܢ ܕܢܬܕܟܪܘܢ ܒܪ̈ܓܫܐ ܕܬܘܕܝܬܐ ܘܐܝܩܪܐ ܘܩܘܼܒܠܛܝܒܘܬܐ. ܒܚܘ̣ܒܐ ܘܒܗܝܡܢܘ̣ܬܐ ܪܒܬܐ ܙܳܝܚܝ̣ܢ ܗ̱ܘܘ ܘܢܳܦܩܝܼܢ ܠܐܘܪܥܢ. ܘܓܰܠܝܐ ܕܗܳܢܐ ܙܰܘܚܐ ܐܳܬܐ ܗ̱ܘܐ ܡ̣ܢ ܐܣܝ̣ܪܘ̣ܬܐ ܘܣܒܝܟܘ̣ܬܐ ܕܝܠܗܘܢ ܒܟܘ̣ܪܣܝܐ ܫܠܝ̣ܚܝܐ ܕܐܢܛܝܘܟܝܐ. ܗ̇ܢܐ ܕܢܨܚܢܐ ܪܘܚܢܝܐ ܡܰܠܒܫ ܠܡܗܝ̈ܡܢܐ ܐ݀ܡܪ ܐ̱ܢܐ ܘܩܠܝ̣ܪܘ̇ܣ ܥܕܬܢܝܐ ܒܙܰܘܥܝ̈ܗܘܢ ܓܰܘ̈ܝܐ ܘܒܰܪ̈ܝܐ.

ܒܪܝܫܢܘ̣ܬܗ ܕܛܘܒܬܢܘܬܗ ܕܡܪܝ ܒܣܝܠܝܘܣ ܬܐܘܡܐ ܩܕܡܝܐ ܡܦܪܝܢܐ ܕܡܕܢܚܐ ܐܬܛܝܒܢܢ ܒܦܘ̣ܬܚܐ ܘܒܘܪܟܐ ܘܩܘ̣ܕܫܐ ܕܬܪܡܝܬܐ ܕܒܝܬ ܝܬܡ̈ܐ ܘܡܓܙ̈ܝܐ ܕܐܬܟܰܢܝܰܬ ܒܫܡ ܟܺܐܦܰܐ ((Kefa ܘܡܕܫܢܐ ܠܩܕܝܫܘܬܗ ܕܦܛܪܝܪܟܐ ܕܝܠܢ ܡܪܢ ܡܪܝ ܐܝܓܢܐܛܝܘܣ ܙܟܝ ܩܕܡܝܐ. ܩܘܒܠܐ ܘܙܰܘܚܐ ܕܗܪܟܐ ܡܬܗܪ ܗ̱ܘܐ ܠܚܙ̈ܝܐ. ܘܕܝܼܠܝ̈ܬܗ ܓܳܪ̈ܦܳܢ ܒܪܢܫܐ ܠܒܘܼܠܗܝܐ ܘܠܰܬܘܰܗܬܐ. ܥܕܢܐ ܗ̱ܘܐ ܡܫܚܠܦܐ ܡܛܠܬܝ. ܐܟܡܢ ܕܛܘܪ̈ܐ ܘܢܰܚ̈ܠܐ ܘܫܠܒ̈ܐ ܘܐܝܠܢ̈ܐ ܘܦܩܥ̈ܬܐ܆ ܘܒܚܕܐ ܠܡܐܡܪ: ܟܐܦ̈ܐ ܕܐܪܥܐ ܘܩܘܼ̈ܠܥܐ ܕܚܩ̈ܠܬܐ ܐܫܬܚܠܦܘ ܗ̱ܘܘ ܠܒܢܝ̈ܢܫܐ. ܨܰܘܬܐ ܕܢܥܡ̈ܬܐ ܘܩ̈ܠܐ ܥܕܬܢ̈ܝܐ ܒܣܝ̈ܡܐ ܕܡܢ ܥܘܼܡ̈ܩܐ ܕܠܒܘ̈ܬܐ ܡܬܐܡܪܝܢ ܗ̱ܘܘ܆ ܙܐܡ ܗ̱ܘܐ ܒܫܶܬܩܐ ܕܟܝܢܐ ܝܰܪܘܩܐ ܘܒܗܝܼܠܐ. ܘܰܚܠܶܐ ܗ̱ܘܐ ܨܰܘܬܐ ܗܢܐ ܗܢܝܐܐ ܥܕܡܐ ܠܗܝ ܕܢܥܦܩ ܘܢܟܪܘܟ ܠܟܠ ܐ̱ܢܫ ܒܫܰܗܝܘܼܬܐ ܫܠܝܛܬܐ. ܘܐܢܐ ܐܟܡܢ ܕܛܒܝܥ ܗ̱ܘܝܬ ܒܚܠܡܐ ܡܕܡ ܕܡܘܒܠ ܠܝ ܠܫܰܦܪܐ ܥܡܝܩܐ ܕܡܫܝܼܚܝܘܼܬܐ. ܕܩܠ ܙܰܘܚܐ ܗܿܘ ܕܡܐ ܗ̱ܘܐ ܠܗܿܘ ܕܰܗܘܼܐ ܒܡܥܠܬܗ ܕܡܪܢ ܠܐܘܪܫܠܡ. ܘܡܣܬܟܠܢܘܼܬܐ ܘܡܬܒܰܝܢܢܘܼܬܐ ܕܓܰܘ̈ܝܬܐ ܕܟܪܘܙܘܬܐ ܕܡܥܠܝܘܬܗ ܕܚܣܝܐ ܨܠܝܒܐ܆ ܪ̈ܡܙܢ ܠܗܝ ܕܐܦ ܗܘܼ ܒܗܝܼ ܟܕ ܗܝܼ ܐܝܟܢܝܘܬܐ ܕܚܘܼ̈ܫܒܐ ܪܡܐ ܗ̱ܘܐ ܒܥܕܢܐ ܗܿܘ.  

   ܚܓ̈ܐ ܗܠܝܢ ܕܡܘܼܬ ܡܘܼܙܳܪܐ ܪܘܼܚܢܝܐ ܘܗܰܘܢܳܢܝܐ ܗ̱ܘܘ ܡܛܠܬܢ. ܕܡܢܗܘܢ ܫܶܪܬ ܠܝ̣ ܕܠܡ ܣܥܘܪܘܬܐ ܕܐܝܙܓܕܐ ܦܛܪܝܪܟܝܐ ܡܥܒܕ̈ܢܘܬܐ ܣܓܝ̈ܐܬܐ ܡܙܝ̣ܥܐ ܒܓܘܫܡܐ ܕܥܕܬܐ ܣܘܪܝܝܬܐ ܕܗܢܕܘ. ܒܛܟܣܐ ܕܨܠܘ̈ܬܐ ܘܩܘܪ̈ܒܐ ܐܠܗ̈ܝܐ ܡܪܓܫ ܒܪܢܫܐ ܕܠܡ ܡܕܥܐ ܕܡܗܝ̈ܡܢܐ ܡܬܚܝܕ ܥܡ ܐܠܗܐ. ܘܡܥܒܕ̈ܢܘܬܐ ܕܪܘܚܐ ܛܝ̈ܦܢ ܘܓܳܡܪ̈ܢ ܘܡܙ̈ܝ̣ܥܢ ܡܗܝ̈ܡܢܐ ܠܩܰܘܡܐ ܚܕ ܕܠܒܪ ܡ̣ܢ ܥܝܳܕܐ. ܘܬܢܢ ܐܬܓܠܝܬ݀ ܠܝ ܩܪܝܚܐܝܬ ܗܘ̣ ܒܪܢܫܐ ܐܢܗܘ̣ ܕܡܰܬܩܰܢ ܫܦܝܪܐܝܬ ܒܗ̇ܠܝܢ ܕܡܰܕܥܐ܆ ܡܬܛܝܒ ܐܦ ܠܡܬܩܢܘ̣ ܗܘ̣ ܠܗ ܒܗ̇ܠܝܢ ܕܐܠܗܐ. ܘܗ̇ܟܢ ܡܫܬܦ̈ܥܢ ܒܠܒܗ ܡܝܬܪ̈ܬܐ ܡܫܝ̣ܚ̈ܝܬܐ ܕܐܝܬܝܗܝܢ: ܗܝܡܢܘܬܐ ܘܣܒܪܐ ܘܚܘܒܐ. ܗ̇ܕܐ ܡ̇ܢ ܡ̣ܢ ܚܘܪܐ ܓܰܘܳܢܝܐ. ܘܡ̣ܢ ܟܝܬ ܚܰܘܪܐ ܡܫܝ̣ܚܳܝܐ ܕܝܢ܆ ܬܶܢܝܳܐ ܕܨܠܘ̈ܬܐ ܘܡܫܬܘܬܦܢܘ̣ܬܐ ܕܡܗܝ̈ܡܢܐ ܒܩ̈ܠܐ ܐܝܟ ܡܫܠܡܢܘ̣ܬܐ ܥܬܝ̣ܩܬܐ ܡܨܰܝܒܐ ܡܗܝ̈ܡܢܐ ܠܘܬ ܛܘܒܬܢܘ̣ܬܐ ܚܕܐ ܪܘܚܢܝܬܐ ܘܟܢܘܫܝܝܬܐ ܕܡܓܪܕܝܐ ܡܼܢ ܪܘܚܐ ܕܫܘܼܥܠܝܐ ܘܡܬܩܒܠܐ ܡ̣ܢ ܟܝܢܐ ܐ̱ܢܫܝܐ. ܐܠܐ ܙܕܩ ܠܝ ܠܡܩܪܚܘ̣ ܕܠܡ ܪܒܘܬ ܢܦܫܐ܆ ܡܝܬܪܘܬܐ ܗ̱ܝ ܕܡܫܪܪܐ ܬܘܟܠܢܐ ܝܳ݀ܬܢܳܝܐ ܘܕܳܒܪܐ ܠܗ ܠܒܪܢܫܐ ܠܡܣܥܪ ܣܘܥܪ̈ܢܐ ܪܘܪ̈ܒܐ ܘܥܫܝ̈ܢܐ. ܐܦ ܗܪܟܐ ܡܬܚܙܝܐ ܕܠܘܩܒܠ ܡܝܬܪܘܬܐ ܗ̇ܕܐ ܙܥܘܪܘܬ ܢܦܫܐ ܩܒܝ̣ܥܐ ܕܡܢܗ̇ ܢܳܒܥܝ̣ܢ ܗܠܝܢ ܕܫܦܘܪܬܢܘܬܐ ܘܫܘܒܚܐ ܣܪܝ̣ܩܐ.

ܒܩܛܝܪ ܡܼܢ ܨܪܝܼܟܘܼܬܐ ܘܰܡܓܙܝܘܼܬܐ ܘܡܣܟܢܘܼܬܐ ܕܦܳܪ̈ܣܢ ܟܢܦ̈ܝܗܝܢ܆ ܛܰܝܘܦܘܬܐ ܕܝܠܢ ܒܗܠܝܢ ܕܚ̈ܝܐ ܡܫܬܚܠܦܐ ܒܗܢܕܘ ܠܥܰܡܝܼܩܘܼܬܐ ܚܕܐ ܕܡܬܗܒܒܐ ܒܦܫܝܛܘܼܬܐ ܒܣܝܼܡܬܐ ܘܢܝܼܚܬܐ. ܩܘܪ̈ܒܐ ܘܠܘܡ̈ܕܐ ܘܟܢܘܼ̈ܫܝܐ ܘܗܪ̈ܓܐ ܘܫܪܟܐ ܕܚܦܝܼ̈ܛܘܳܬܐ ܪ̈ܘܼܚܢܝܬܐ ܘܡܪ̈ܕܘܬܢܝܬܐ ܕܡܬܥܒܕܝܢ ܬܚܝܬ ܬܛܠܝܠܐ ܕܥܕܬܐ܆ ܦܳܫܚܝܼܢ ܒܪܢܫܐ ܡܼܢ ܚܝ̈ܐ ܛܝܘ̈ܦܐ ܘܫܚܝܼ̈ܡܐ ܘܦܳܫܘܪ̈ܐ ܘܡܨܝܒܝܢ ܠܗ ܠܘܬ ܚܝ̈ܐ ܥܰܡܝܼ̈ܩܐ ܘܥܪ̈ܝܼܡܐ ܘܬܡܝܼ̈ܡܐ. ܘܬܪܒܝܼܬܐ ܘܦܳܠܚܘܼܬܐ ܕܚܝ̈ܐ ܪ̈ܘܚܢܝܐ܆ ܠܘ ܒܠܚܘܕ ܒܟܗܢܘܬܐ (ܩܫܝܼ̈ܫܐ ܘܕܝܪ̈ܝܐ ܘܚܣܝ̈ܐ) ܐܣܝܼܪܐ܆ ܐܠܐ ܐܦ ܒܗܠܝܢ ܙܥܘܪ̈ܐ ܘܒܨܝܪ̈ܐ ܘܒܟܠ ܩܰܘܡ̈ܢ ܘܡܘܼ̈ܫܚܳܢ ܕܒܢܝ̈ܢܫܐ. ܘܒܚܕܐ ܠܡܐܡܪ ܟܠܗܘܢ ܐܚ̈ܐ ܕܡܫܝܼܚܐ܆ ܡܢܰܣܝܢ ܠܡܬܚܦܛܘ ܒܫܘܼܡܠܳܝ ܗܠܝܢ ܕܐܣܝܼܪܝܼܢ ܒܬܰܪܒܝܼܬܐ ܘܦܳܠܚܘܼܬܐ ܪܘܼܚܳܢܳܝܬܐ. ܥܠܗܕܐ ܪܘܳܙܐ ܪܘܼܚܳܢܳܝܐ܆ ܡܰܥܒܕܢܐ ܡܬܚܙܐ ܒܕܝܼ̈ܠܝܳܬܗ. ܘܒܝܕ ܗܕܐ ܒܢܝ̈ܢܫܐ ܠܘ ܒܠܚܘܕ ܡܼܢ ܝܘܩܪܐ ܘܰܢܗܳܓܐ ܘܥܩ̈ܬܐ ܕܚܝ̈ܐ ܡܫܬܘܙܒܝܼܢ܆ ܐܠܐ ܐܦ ܩܳܢܝܢ ܢܦܐܫܐ ܡܼܢ ܕܘܼ̈ܚܳܠܐ ܘܣܘܪ̈ܕܐ ܕܡܦܪܟܠܝܢ. ܘܐܟܡܐ ܕܡܫܬܘܙܒܝܼܢ ܐܦ ܡܼܢ ܐܢܢܝܘܬܐ ܣܡܝܼܡܬܐ ܘܩܳܪܒܝܼܢ ܠܘܬ ܗܿܝ ܕܢܗܘܘܢ ܢܝܼܚ̈ܐ ܘܡܟܝܼ̈ܟܐ ܘܒܣܝܼ̈ܡܐ ܒܚܘܒܐ ܕܡܫܝܼܚܐ. ܗܠܝܢ ܘܕܐܝܟ ܗܠܝܢ ܡܕܝܼ̈ܠܢ ܗ̱ܘ̈ܝ ܘܡܥܝܼܪ̈ܢ ܒܚܘܼ̈ܫܒܝ ܦܟܝܼܪ̈ܐ ܐܝܕܝ̈ܐ ܗܿܢܝܢ ܕܒܠܒܐ ܐܫܝܼܕܐ ܘܙܥܳܩ̈ܬܳܐ ܘܙܩ̈ܬܐ ܓܰܘ̈ܝܐ ܡܬܦܫ̈ܛܢ ܗ̱ܘ̈ܝ ܠܫܡ̈ܝܐ ܒܙܒܢ ܩܘܪܒܐ ܐܠܗܝܐ. ܘܫܘܦܪܐ ܪܘܚܢܝܐ ܕܡܙܝܼܥ ܗ̱ܘܐ ܐܢܝܢ ܠܐܝܕ̈ܝܐ܆ ܓܳܠܐ ܗ̱ܘܐ ܩܪܝܼܚܐܝܬ ܨܰܗܝܘܬܐ ܘܣܰܘܝܘܼܬܐ ܕܝܠܗܝܢ ܠܚ̈ܝܐ ܡܳܪ̈ܢܳܝܐ ܡܫܝܼ̈ܚܝܐ.

ܩܕܝܫܐ ܐܓܘܣܛܝܢܘܣ ܐܡܿܪ: «ܗܘ ܒܪܢܫܐ ܙܕܩ ܕܢܒܥܐ ܐܠܗܐ ܛܒ ܚܠܝܐܝܬ܆ ܐܝܟܢܐ ܕܢܫܬܟܚ ܘܢܗܘܐ ܐܝܬ. ܘܙܕܩ ܕܢܫܟܚ ܠܐܠܗܐ܆ ܐܝܟܢܐ ܕܐܝܟ ܐܝܬܝܐ ܝܬܝܪ ܥܙܝܙܐܝܬ ܢܫܬܟܚ ܘܢܬܒܥܐ». ܘܐܢܿܐ ܡܿܢ ܐܡܿܪ ܐ̱ܢܐ: ܚܝ̈ܐ ܣܝܼܡܬܐ ܐܢܘܢ ܪܒܬܐ ܕܐܫܬܰܟܢܘ ܠܒܢܝ̈ܢܫܐ ܡܼܢ ܐܠܗܐ. ܘܡܫܬܰܟܚܳܢܘܼܬܐ ܕܗܕܐ ܣܝܼܡܬܐ ܠܐ ܗܳܘܝܐ ܘܠܐ ܡܬܓܡܪܐ ܐܠܐ ܐܢ ܒܡܣܬܟܠܢܘܬܐ ܕܗܠܝܢ ܕܥܠܡܐ ܓܰܘܝܐ ܕܒܪܢܫܐ. ܘܗܠܝܢ ܕܡܬܚܦܛܝܼܢ ܠܡܣܬܟܠܘ ܠܒܪܢܫܐ܆ ܘܡܦܣܝܢ ܒܗܠܝܢ ܕܘܳܠܝ̈ܬܐ ܕܫܠܘܼܚܝܐ misyon ܕܝܠܗܘܢ܆ ܕܠܐ ܦܘܪܬܟ ܣܝܼܡܝܼܢ ܘܰܫܟܝܼܚܝܼܢ ܒܠܒܐ ܕܣܝܼܡܬܐ ܗܕܐ. ܘܚܕܘܐ ܕܝܠܗܘܢ ܓܰܘܳܝܐ ܘܒܰܪܳܝܐ ܠܐ ܡܫܬܡܠܐ ܐܠܐ ܐܢ ܕܢܝܩܪܘܢܝܗܝ ܘܢܰܚܒܘܼܢܝܗܝ ܘܢܶܛܪܘܢܝܗܝ ܘܰܢܛܰܘܪܘܢܝܗܝ ܒܡܠܬܐ ܘܒܥܒܕܐ ܠܒܪܢܫܐ ܕܐܝܬܘܗܝ ܣܝܼܡܬܐ ܝܼܚܝܼܕܳܝܬܐ ܕܐܠܗܐ ܥܠ ܐܦ̈ܝ ܐܪܥܐ.

ܘܐܡܿܪ ܬܘܒ ܩܕܝܼܫܐ ܕܟܝܼܪܐ ܒܨܒܘܬ ܚ̈ܝܐ ܟܢܘܼ̈ܫܝܳܝܐ: «ܥܠܡܐ ܡܿܢ ܣܶܦܪܐ ܗ̱ܘ ܬܗܝܼܪܐ. ܘܗܠܝܢ ܕܠܐ ܡܬܦܪܫܝܼܢ ܣܟ ܡܼܢ ܒܬܝ̈ܗܘܢ܆ ܠܐ ܩܳܪܝܢ ܐܠܐ ܐܢ ܛܪܦܐ ܡܼܢ ܣܶܦܪܐ ܗܢܐ». ܐܟܡܐ ܕܡܬܚܙܝܐ ܡܼܢ ܓܒܐ ܕܚ̈ܝܐ ܟܢܘ̈ܫܝܝܐ ܣܓܝ̈ܐܬܐ ܙܠܥܬ ܡܼܢ ܣܥܘܪܘܬܐ ܗܕܐ ܕܡܬܚܫܒܐ ܟܪܘܼܠܬܐ ܦܪܝ̣ܫܬܐ ܒܚ̈ܝ. ܘܕܝܠܢܐܝܬ ܦܨܝܼܚ ܐ̱ܢܐ ܕܗܘܼܐ ܠܝ ܓܕܐ ܠܡܚܙܐ ܐܬܪܐ ܕܓܰܢܕܝ ܗܢܐ ܕܒܝܕ ܡܘܟܟܗ ܠܒܝܒܐ ܘܚܠܝܨܐ ܩܰܕܝ ܚܐܪܘܬܐ ܕܗܢܕܘ. ܘܐܝܟܐ ܕܛܐܦ ܗ̱ܘܝܬ ܡܢܣܐ ܗ̱ܘܝܬ ܠܡܬܓܘܪܪܘ ܒܫܪܪܐ ܘܣܘܼܟܳܠܐ ܓܰܘܳܝܐ ܕܗܿܝ ܕܐܡܝܼܪܐ ܠܓܰܢܕܝ «ܚܝܼܝ ܚܝ̈ܐ ܐܟܡܐ ܕܒܿܥܐ ܐܢܬ ܕܬܚܙܐ ܐܢܘܢ». ܡܘܕܐ ܐ̱ܢܐ ܡܕܝܢ ܠܒܛܝܠܘܬܐ ܐܠܗܝܬܐ ܕܐܙܝܥܬ݀ ܚܝܠܐ ܘܪܘܚܐ ܠܡܫܡܠܝܘ̣ ܣܥܘܪܘܬܐ ܗܕܐ ܕܡܠܝܐ ܥܘܗܕ̈ܢܐ ܘܣܘ̈ܟܠܐ ܪ̈ܘܚܢܝܐ ܠܐ ܡܬܢܫܝ̈ܢܐ ܣܒܝܼ̈ܣܝ ܚܕܘܐ ܘܪܘܙܐ ܒܪܡ ܠܐܘܬܐ ܪܒܬܐ. ܐܠܐ ܡܛܠܬܝ ܐܝܟ ܚܙܘܼܩܝܐ ܓܰܘܝܐ ܗ̱ܘܬ. ܐܟܡܢ ܕܠܐ ܒܗܢܕܘ ܩܐܡ ܗ̱ܘܝܬ. ܐܠܐ ܒܐܝܟܢܝܘܬܐ ܚܕܐ ܗܶܕܣܳܢܳܝܬܐ ܥܰܡܝܩܬܐ: ܡܼܢ ܓܒܐ ܚܕ ܫܛܝܼܚܐܝܬ ܒܝܢܬ ܕܪ̈ܥܐ ܕܚܙܘܩܝܐ ܓܰܘܳܝܐ ܙܪܝܙܝܐܝܬ ܒܩܘܪ̈ܒܐ ܐܠܗ̈ܝܐ ܡܬܛܝܒ ܗ̱ܘܝܬ. ܘܡܼܢ ܓܒܐ ܐ̱ܚܪܢܐ ܒܗܝܟܠܐ ܕܚܙܘܩܝܐ ܗܢܐ ܚܠܝܨܐܝܬ ܡܘܼܙܳܪ̈ܐ ܬܪ̈ܥܝܼܬܢܳܝܐ ܥܳܒܕ ܗ̱ܘܝܬ.

ܐܟܡܐ ܕܡܬܬܡܝܼܫܐ ܡܼܢ ܟܝܢܐ ܕܙܒܢܢ܆ ܗܘ ܒܪܢܫܐ ܢܳܨܚ ܒܡܰܨܠܚ̈ܢܘܳܬܗ ܘܪܘܝܼܚܘܼܬ ܬܪܥܝܬܗ ܘܝܘܠܦܢܗ ܒܕܪܐ ܗܢܐ ܕܒܗ ܚܕ̈ܬܬܐ ܘܬܶܩܢܳܝ̈ܬܐ ܓܳܕ̈ܠܢ ܛܘܣܐ ܠܪܘܡܐ. ܕܡܬܚܦܛ ܘܝܳܨܦ ܠܡܒܪܐ ܫܪ̈ܝܐ ܠܟܠܗܘܢ ܩܛܪ̈ܘܗܝ. ܐܠܐ ܒܪܡ ܡܚܝܼܠܘܼܬܐ ܘܰܒܨܝܼܪܘܼܬܐ ܡܬܚܙܝܐ ܒܡܰܨܠܚܢܘܼܬܐ ܕܡܨ̈ܥܝܐ ܕܕܪܫܝܢ ܐܘܪܚܐ ܠܡܨܪܐ ܘܠܡܫܪܐ ܦܘܼܪ̈ܟܠܐ ܘܰܦܟܳܪ̈ܐ ܕܡܕܘܕܝܢ ܘܡܫܚܩܝܼܢ ܒܪܢܫܐ ܩܨܬ ܡܓܰܙܝܘܼܬܐ ܕܚܝ̈ܐ ܪ̈ܘܚܢܝܐ ܘܐܝܬܝ̈ܩܳܝܐ. ܘܚܝ̈ܐ ܠܘ ܡܫܟܐܝܬ ܘܐܝܟ ܕܒܦܓܥܐ ܡܬܦܪܢܣܝܼܢ. ܐܠܐ ܡܢ ܚܝܠܐ ܪܘܼܚܢܝܐ ܥܠܬ ܟܠ ܥܠ̈ܠܢ (ܕܐܝܬܘܗܝ ܐܠܗܐ). ܛܘܦܣܐ ܗ̱ܘ ܛܒܐ ܠܗܕܐ ܐܣܝܐ ܗܿܘ ܣܘܪܝܝܐ ܕܟܠ ܝܘܡ ܡܥܕܪ ܡܐܘ̈ܬܐ ܕܟܪ̈ܝܗܐ ܘܡܪ̈ܥܐ ܒܒܝܬܗ. ܕܪܢܐ ܒܗܝ ܕܡܘܢ ܡܨܐ ܕܢܬܠ ܘܠܐ ܒܗܝ ܕܡܘܢ ܡܨܐ ܕܢܶܣܒ ܡܼܢ ܒܢܝ̈ܢܫܐ. ܕܚ̈ܝܐ ܡܬܬܟܝܼܢܝܼܢ ܘܡܬܩܝܡܝܢ ܐܝܟ ܕܒܣܘܓܐܐ ܡܼܢ ܗܿܘ ܡܐ ܕܝܳܗܒܝܼܢܢ ܘܦܳܠܓܝܼܢܢ ܥܡ ܐ̱ܚܪ̈ܢܐ. ܘܡܼܢ ܡܥܒܕܢܘܼܬܐ ܕܪܝܼܫܘܼܬܐ ܗܕܐ ܕܡܫܪܪܐ ܚܘܒܗ ܕܠܐܦ̈ܝ ܐܠܗܐ ܘܩܪܝܼܒܐ ܐܡܿܪ ܗ̱ܘܐ ܒܒܝܬܗ ܟܕ ܣܡܝܼܟܝܼܢܢ ܦܬܘܪܗ ܡܫܪܬܚܐ: ܡܓܢ ܝܗܒ ܠܝ ܐܠܗܐ. ܐܦ ܐܢܐ ܡܓܢ ܝܳܗܒ ܐ̱ܢܐ ܠܒܢܝ̈ܢܫܐ. ܘܟܕ ܡܬܚܦܛ ܗ̱ܘܝܬ ܠܡܣܬܟܠܘ ܗܠܝܢ ܕܰܟܣܶܝܢ ܒܥܘܒܐ ܕܡܠܬܗ ܘܦܫܪ ܗ̱ܘܝܬ ܡܐܟ̈ܠܬܐ ܛܥܝܼ̈ܡܬܐ ܕܦܬܘܪܗ܆ ܡܚܕܐ ܪܶܓܫܶܬ ܕܠܡ ܗܘܼ ܒܪܢܫܐ ܐܢܗܘ ܕܡܬܩܢ ܢܦܫܗ ܘܡܕܥܗ ܠܦܘܬ ܪ̈ܝܼܫܘܳܬܐ ܕܪܘܚܐ܆ ܢܳܗܪ ܘܡܬܚܣܢ ܒܗܠܝܢ ܕܡܩܢܝܢ ܫܪ̈ܝܐ ܠܩܛܪ̈ܐ ܘܰܦܟܳܪ̈ܐ ܘܦܘܼܪ̈ܟܠܐ ܕܚ̈ܝܐ. ܘܗܕܐ ܠܐ ܡܨܝܐ ܠܡܫܬܪܪܘ ܐܠܐ ܐܢ ܕܗܝܼ ܪܘܚܐ ܬܗܘܐ ܡܣܰܘܣܝܳܢܝܼܬܐ ܘܡܕܒܪܢܝܬܐ ܠܝܨܪ̈ܐ ܕܦܓܪܐ.

ܕܪܘܚܐ ܡܿܢ ܡܬܝܼܩܐ ܗ̱ܝ ܡܼܢ ܐܠܗܐ. ܘܕܡܝܐ ܗ̱ܝ ܠܩܪܘܣܛܠܘܣ ܣܓܝ ܙܳܘܝ̈ܬܐ܆ ܕܗܘܠܐ ܕܝܠܗ ܚܘܒܐ ܗ̱ܘ. ܐܠܐ ܩܪܘܣܛܠܘܣ ܗܢܐ ܩܪܝܼܡ ܗ̱ܘ ܒܰܫܥܝܼܢܐ ܡܕܡ ܕܡܬܩܪܐ «ܐܢܐ» ܟܐܡܬ ܐܢܢܝܘܬܐ. ܘܚܝ̈ܐ ܠܝܬܝܗܘܢ ܐܠܐ ܐܢ ܗܿܝ ܕܢܬܢܩܕ ܩܪܘܣܛܠܘܣ ܡܼܢ ܫܥܝܼܢܐ ܗܢܐ. ܘܐܠܘܠܐ ܢܩܕܘܬܐ ܗܕܐ܆ ܐܘܣܝܐ ܕܚܝ̈ܐ ܠܐ ܨܳܡܚܐ. ܘܟܠ ܟܡܐ ܕܢܰܩܕܘܼܬܐ ܗܕܐ ܠܐ ܡܬܓܡܪܐ ܘܨܰܡܘܼܚܘܼܬܐ ܗܕܐ ܠܐ ܡܫܬܡܠܝܐ܆ ܠܐ ܡܬܗܒܒ ܘܠܐ ܢܳܨܚ ܚܘܒܐ ܕܐܝܬܘܗܝ ܚܝܠܐ ܪܘܚܢܝܐ ܘܝܳܩܕܐ ܪܡܐ ܕܚܝ̈ܐ. ܘܒܢܝ̈ܢܫܐ ܕܐܫܟܚܘ ܢܦܫܗܘܢ ܪܘܚܢܝܬܐ܆ ܘܐܨܠܚܘ ܒܢܰܩܕܘܬܐ ܕܫܥܝܼܢܐ ܕܐܢܢܝܘܼܬܗܘܢ ܒܡܨܛܡܚܳܢܘܼܬܐ ܕܐܘܣܝܐ ܗܕܐ܆ ܒܰܫ̈ܝܼܠܐ ܡܬܚܫܒܝܢ܆ ܘܩܳܢܝܢ ܗܝܝܘܬܗܘܢ ܒܗܠܝܢ ܕܐܝܬܘܬܗܘܢ. ܘܐܝܟ ܡܠܬ ܡܫܝܼܚܐ ܠܘ ܠܒܰܪ̈ܝܳܬܐ܆ ܐܠܐ ܠܗܠܝܢ ܕܒܪܢܫܐ ܓܰܘܝܐ ܡܢܨܚܝܼܢ ܘܡܝܩܪܝܢ. ܘܗܠܝܢ ܕܠܐ ܐܫܟܚܘ ܢܦܫܗܘܢ ܪܘܚܢܝܬܐ܆ ܗܿܢܘܢ ܐܢܘܢ ܕܠܐ ܐܬܡܨܝܘ ܠܡܢܩܕܘ ܫܥܝܼܢܐ ܕܐܢܢܝܘܬܗܘܢ. ܘܗܠܝܢ ܐܦܢ ܒܓܘܫܡܐ ܪ̈ܒܐ ܢܗܘܘܢ܆ ܙܥܘܼܪ̈ܐ ܡܬܚܫܒܝܼܢ. ܘܩܳܢܝܢ ܗܝܝܘܬܗܘܢ ܒܗܠܝܢ ܕܩܰܢܝܘܬܗܘܢ. ܘܛܘܼܝܳܡܐ ܕܝܠܗܘܢ ܗܳܘܐ ܠܦܘܬ ܒܰܪ̈ܝܳܬܐ. ܥܠܗܕܐ ܐܡܿܪ ܝܘܚܢܢ ܦܘܡܐ ܕܕܗܒܐ: «ܡܠܠ ܒܠܚܘܕ ܗܿܠܝܢ ܕܝܘܬܪܢܐ ܘܒܢܝܢܐ ܕܐܚܘܟ. ܘܐܦܠܐ ܡܠܬܐ ܐ̱ܚܪܬܐ ܬܰܩܦ ܠܗܕܐ. ܕܗܘ ܡܪܝܐ ܡܛܠܗܕܐ ܝܗ̱ܒ ܠܟ ܦܘܡܐ ܘܠܫܢܐ. ܐܝܟܢܐ ܕܬܣܩ ܠܗ ܫܘܒܚܐ ܘܬܘܕܝܬܐ܆ ܘܰܬܒܰܢܐ ܒܗ ܠܐܚܘܟ.»

ܐܟܡܐ ܕܒܥܐ ܕܢܚܙܐ ܐܢܘܢ܆ ܗܟܢܐ ܡܬܚܘܐ ܟܝܢܐ ܘܐܘܣܝܐ ܕܚܝ̈ܐ ܠܒܪܢܫܐ. ܘܐܢܿܐ ܡܿܢ ܚܙܝܬ ܗܿܘ ܡܐ ܕܒܳܥܐ ܗ̱ܘܝܬ ܠܡܚܙܐ ܒܗܢܕܘ. ܘܟܒܪ ܡܛܠ ܕܣܒܝܣܐܝܬ ܕܳܩܬ ܘܪܕܐ܆ ܘܐܗܡܝܬ ܟܘܼ̈ܒܐ. ܐܠܐ ܗܿܝ ܕܫܪܝܪܐ܆ ܐܠܨܝܐ ܚܳܙܐ ܐ̱ܢܐ ܚܙܘܼ̈ܩܝܐ  ܕܐܝܟ ܗܠܝܢ. ܕܡܢܦܨܝܢ ܓܝܪ ܒܪܢܫܐ ܡܼܢ ܟܠ ܙܢܐ ܕܗܝܡܢܘܬܐ ܘܬܪܥܝܼܬܐ ܡܬܰܚܰܡܬܐ. ܘܥܡ ܗܝ ܕܦܳܬܚܝܼܢ ܐܘܼܦ̈ܩܐ ܚܕ̈ܬܐ܆ ܐܦ ܢܳܩܠܝܼܢ ܐܘܪܚܐ ܠܘܬ ܨܰܘܒܐ ܕܗܝܡ̈ܢܘܳܬܐ ܘܐܚܝܼ̈ܕܘܳܬܐ ܡܥܰܫ̈ܢܳܢܝܬܐ ܘܰܡܚܰܣܢ̈ܢܝܬܐ. ܕܐܝܟ ܐܝܕܐ ܡܥܒܕܢܘܬܐ ܫܒܩܰܬ ܣܥܘܪܘܬܐ ܒܒܢ̈ܝ ܠܘܝܬܐ܆ ܠܐ ܝܳܕܥ ܐ̱ܢܐ. ܐܠܐ ܒܡܰܥܒ̈ܕܢܘܳܬܗܿ ܓܰܘ̈ܝܳܬܐ ܘܟܰܣ̈ܝܳܬܐ ܡܛܠܬܝ ܠܘ ܛܪܦܐ ܒܠܚܘܕ܆ ܐܠܐ ܐܝܟ ܩܪܝܢܐ ܗ̱ܘܬ ܕܟܬܒܐ ܚܕܬܐ. ܐܢܗܘ ܓܝܪ ܕܒܥܝܢ ܐܢܬܘܢ ܠܡܣܩ ܠܪܰܘܡܐ ܪܡܐ ܕܪܘܚܐ ܕܝܠܟܘܢ܆ ܐܦ ܐܢ̱ܬܘܢ ܡܨܝܐ ܬܬܢܣܘܢ ܚܙܘܩܝܐ ܕܐܝܟ ܗܢܐ. ܒܬܢܘܝ ܕܬܦܬܚܘܢ ܥܝܢܐ ܕܪܘܚܐ ܘܫܒ̈ܝܼܠܐ ܕܪܘܙܐ ܕܝܠܟܘܢ ܓܰܘܳܝܐ. ܕܢܳܗܪ ܘܝܳܠܦ ܘܡܫܬܘܫܛ ܘܡܬܛܘܪ ܒܪܢܫܐ ܟܕ ܡܬܛܝܠ ܘܟܳܪܟ ܒܪ̈ܘܡܐ ܗܠܝܢ. ܘܗܟܢ ܗܿܘܐ ܠܗ ܗܝܕܝܟ ܣܦܩܘܬܐ ܠܡܚܟܡ ܗܿܝ ܕܐܡܝܼܪܐ ܠܪܰܒܺܝܢܕܪܰܢܰܬ ܬܰܓܘܪ Tagore ܐܡܘܪܐ ܪܒܐ ܗܢܕܘܝܐ: «ܕܶܡܟܶܬ܆ ܘܒܚܠܡܝ ܚܙܝܬ ܕܚܝ̈ܐ ܚܕܘܐ ܐܢܘܢ. ܘܟܕ ܐܬܬܥܝܼܪܬ܆ ܐܣܬܟܠܬ ܕܐܝܬܝܗܘܢ ܬܫܡܫܬܐ. ܘܟܕ ܫܰܪܝܬ ܠܡܦܠܚ܆ ܡܚܕܐ ܡܳܫܬ ܕܐܦ ܗܝܼ ܬܫܡܫܬܐ ܗܳܘܝܐ ܚܕܘܐ».   

30  ܬܡܘܙ ܕܟܘܪ̈ܢܘܗܝ 2006 : ܕܝܪܐ ܕܟܘܪܟܡܐ - ܡܪܕܐ: ܛܘܪܥܒܕܝܢ

ܝܘܣܦ ܒܓܬܫ

ܚܣܝܘܼܬܐ ܕܣܘܼܪ̈ܝܝܐ ܕܡܪܕܐ ܘܐܡܝܕ