ܐܬܚܬܡ ܓܝܪ ܚܕܬܐܝܬ ܕܰܘܩܐ ܕܒܝܬ ܓܙܐ ܕܥܕܬܐ ܣܘܪܝܝܬܐ ܬܪܝܨܬ ܫܘܒܚܐ ܒܙܢܐ ܣܓܝ ܡܛܟܣܐ ܠܦܘܬ ܩܝ̈ܢܬܐ ܕܕܝܪܐ ܕܟܘܪܟܡܐ ܒܩܠܐ ܕܡܢܚܐ ܩ̄ܫ ܝܘܣܦ ܐܳܙܡܶܢ ܗ̇ܘ ܛܟܣܗ ܘܛܝܒܗ ܪܒܢ ܐܤܛܦܢ ܦܝ̣ܕܢ ܘܩ̄ܫ ܐܝܣܚܩ ܐܶܪܓܘܢ ܒܡܬܚܐ ܕܬܪܬܝܢ ܫܢܝ̈ܢ. ܟܠܗܝܢ ܩܝ̈ܢܬܐ ܗܠܝܢ ܒܚܕ ܕܰܘܩܐ ܚܡܺܝ̈ܠܢ ܕܐܝܬܘܗܝ ܠܐܦ̈ܝ ܫܶܬ ܫܳܥܝ̈ܢ ܘܦܶܠܓܐ.
ܣܘܓܠܐ ܡ̇ܢ ܗܢܐ ܐܝܬܘܗܝ ܠܦܘܬ ܢܶܥܡ̈ܬܐ ܐܰܘ ܪ̈ܶܟܢܐ ܕܺܝܠܦ ܐܢܘܢ ܡܢܚܐ ܒܕܝܪܐ ܕܟܘܪܟܡܐ ܒܙܒܢ ܝܳܠܘܦܘܬܗ ܫܢܬ ܐܨ̇ܢܓ ܡ̄ 1953 ܡ̣ܢ ܡܠܦܢܐ ܡܝܬܪܐ ܕܡܘܣܝܩܝ ܡܢܳܚ ܢܦܫܐ ܪܒܢ ܓܒܪܐܝܠ ܥܰܠܐܦ ܗ̇ܘ ܕܡܗܝ̣ܪ ܗ̱ܘܐ ܒܛܟܣܝ̈ܬܐ ܕܥܕܬܐ ܘܕܝܠܢܐܝܬ ܒܩܝ̈ܢܬܐ ܕܒܝܬ ܓܙܐ ܠܕܪܓܐ ܥܠܝܐ. ܙܒܢ̱ܬܐ ܩܕܡܝܬܐ ܡ̇ܢ ܐܶܤܬܰܓܠܬ݀ ܣܝܡܬܐ ܗܕܐ ܒܚܡܫܐ ܫܶܘ̈ܝܐ ܫܢܬ 1979 ܒܣܘܝܕ ܐܬܪܐ ܒܝܕ ܡܣܰܓܠܳܢܐ ܥܗܝܕܐ ܩܕܡ ܕܢܬܬܣܪܚ ܟܗܢܐ ܠܥܕܬܐ ܕܡܪܝ ܓܘܪܓܝܣ ܕܢܳܪܫܒܳܪܝ. ܘܙܒܢ̱ܬܐ ܬܪܝܢܝܬܐ ܕܝܢ ܣܰܓܠܗ̇ ܐܝܟ ܟܗܢܐ ܫܢܬ 1992 ܐܠܐ ܒܶܫܬܐ ܫܶܘ̈ܝܐ ܡܶܢܕܪܺܝܫ ܟܰܕ ܡܰܘܣܶܦ ܥܠܰܝܗܘܢ ܝܰܬܺܝܪ̈ܳܬܳܐ ܕܠܳܐ ܫܟܺܝ̈ܚܳܢ ܗ̱ܘ̈ܰܝ ܒܢܽܘܣܟܳܐ ܩܕܡܝܐ ܕܫܘ̈ܝܐ. ܐܝܟ ܡܢܗܝܢ ܕܩܝ̈ܢܬܐ ܕܛܘܪܥܒܕܝܢ ܘܫܘ̈ܚܠܦܐ ܘܙܢܝ̈ܐ ܐ̱ܚܪ̈ܢܐ ܕܩ̈ܠܐ ܗ̇ܢܘܢ ܕܐܝܬ ܠܗܘܢ ܩܝܢܬܐ ܐ̱ܚܪܬܐ. ܥܠܗܕܐ ܒܝܕ ܡܚܝܠܘܬܢ ܚܢܢ ܐܝܟ ܡܳܪ̈ܝ ܥܡܠܐ ܗܢܐ ܐܶܫܬܰܢܝ̈ܝ ܩܝ̈ܢܬܐ ܗܠܝܢ ܡ̣ܢ ܫܘ̈ܝܐ ܒܝܕ ܡܣܰܓܠܢܝܬܐ ܠܚܳܫܘܒܬܐ (ܟܘܦܝܘܬܪ) ܟܕ ܠܩܠܐ ܕܡܢܚܐ ܝܬܝܪ ܫܰܦܝ̣ܢܢ ܘܕܰܟܝ̣ܢܢ ܘܒܕܘ̈ܟܝܬܐ ܠܰܡܫܘܚܬܐ ܕܩܠܗ ܐܰܪܺܝܡܢܰܢ ܠܦܘܬ ܩ̈ܠܐ ܘܩ̈ܛܥܐ ܐ̱ܚܪ̈ܢܐ ܐܝܠܝܢ ܕܒܣܒ̈ܠܬܐ ܐ̱ܚܪ̈ܢܝܬܐ ܣܰܓܠ ܘܙܰܡܰܪ. ܬܘܒ ܦܣܰܩܢܢ ܩܛܥ̈ܐ ܒܕܘ̈ܟܝܬܐ ܘܕܰܒܶܩܢܢ܆ ܐܘܟܝܬ ܢܣܰܒܢܢ ܡ̣ܢ ܬܪ̈ܝܗܘܢ ܢܘ̈ܣܟܐ ܘܐܦܩܢܢ ܢܘܣܟܐ ܚܕ ܓܡܝܪܐ ܘܡܛܟܣܐ ܕܗܫܐ ܚܬܺܝܡ ܗ̱ܽܘ ܘܫܪܝܪܐܝܬ ܫܳܘܶܐ ܠܡܰܫܡܥܬܐ ܕܪ̈ܳܚܡܝ ܡܘܣܝܩܝ ܥܕܬܢܝܬܐ. ܥܰܠܗܳܕܶܐ ܬܢܳܢ ܒܺܐܝܩܳܪܳܐ ܘܩܽܘܠܳܣܳܐ ܥܳܗܕܝ̣ܢܢ ܪܽܘܚܶܗ ܒܰܣܝܡܬܐ ܕܫܰܡܠܺܝ ܦܽܘܠܚܳܢܳܐ ܪܒܐ ܘܡܘܬܪܢܐ ܕܰܐܝܟ ܗܳܢܳܐ ܟܕ ܫܳܒܩ ܠܢ ܣܝ̣ܡܬܐ ܗܕܐ ܪܘܚܢܝܬܐ ܘܥܬܝܪܬܐ. ܘܒܗ ܒܙܒܢܐ ܩܪܒܗ̇ ܡܢܚܐ ܐܝܟ ܕܫܢܐ ܝܰܩܝܪܐ ܘܐܝܟ ܥܘܗܕܢܐ ܛܒܐ ܠܕܪ̈ܐ ܕܳܐܬܝܢ ܠܪ̈ܳܚܡܝ ܩܝ̈ܢܬܐ
ܕܒܝܬ ܓܙܐ ܘܦܪܝ̣ܫܐܝܬ ܠܕܝܪܐ ܕܟܘܪܟܡܐ ܡܒܪܟܬܐ ܘܡܟܬܙܒܢܝܬܐ ܕܐܝܬܝܗ̇ ܗ̱ܘܬ ܒܙܒܢ ܟܘܪܣܝܐ ܥܬܝܩܐ ܕܦܛܪܝܪܟܘܬܐ ܠܡܬܚܐ 640 ܫܢܝ̈ܢ. ܘܗܟܢܐ ܒܝܬ ܓܘܣܐ ܗ̱ܘܬ ܕܝܘܠܦܢܐ ܘܒܝܬ ܨܰܘܒܐ ܕܝܕܘ̈ܥܬܢܐ. ܘܐܝܟ ܬܪܝܢ ܡ̣ܢ ܥܳܡܘܪ̈ܝ ܕܝܪܐ ܕܟܝ̣ܪܬܐ ܕܩܳܡܢܢ ܒܬܫܡܫܬܐ ܗܕܐ܆ ܐܠܨܝܬܐ ܐܶܬܚܰܙܝܰܬ ܠܢ ܕܢܶܦܪܘܣ ܠܕܰܘܩܐ ܗܢܐ܆ ܟܕ ܡ̣ܢ ܡܪܝܐ ܡܦܝ̣ܣܝܢܢ ܡܘܬܪܢܐ ܘܡܰܦܨܚܢܐ ܢܥܒܕܝ̣ܘܗܝ ܠܩܠܝܪܘܣ ܕܝܠܢ ܥܕܬܢܝܐ ܘܠܒܢ̈ܝ ܥܡܐ ܕܝܠܢ ܕܒܟܠ ܐܬܪ ܘܦܢܝ̈ܢ.
ܡܛܠ ܬܪܬܝܢ ܥܠ̈ܠܢ ܚܬܰܡܢܢ ܕܘܩܐ ܗܢܐ: ܩܕܡܝܬ ܕܠܐ ܢܶܬܠܰܝ̈ܬܝܢ ܩܝ̈ܢܬܐ ܗܠܝܢ ܟܘܪ̈ܟܡܢܝܬܐ ܘܢܐܒܕ̈ܢ ܥܡ ܐܘܣܝܐ ܕܝܠܗܝܢ. ܘܬܪܝܢܬ ܕܝܢ: ܚܢܢ ܐܝܟ ܡܰܠ̈ܦܢܝ ܕܝܪܐ ܕܢܺܐܠܦ ܘܢܰܠܦ ܐܢܝܢ ܠܝܠ̈ܘܦܝܢ ܪ̈ܚܝܡܐ. ܘܒܗܝ ܕܩܝ̈ܢܬܐ ܗܠܝܢ ܐܘܣܝܐ ܐܢܝܢ܆ ܩܺܝܢܬܐ ܦܪܝܫܬܐ ܘܒܣܝܡܬܐ ܐܝܬ ܗ̱ܘ̈ܝ ܠܗܝܢ ܝܬܝܪ ܡ̣ܢ ܩܝ̈ܢܬܐ ܐ̱ܚܪ̈ܢܝܬܐ ܕܒܥܕܬܐ ܣܘܪܝܝܬܐ. ܥܠ ܕܦܛܪܝܪܟܘܬܐ ܗܪܟܐ ܩܝܡܐ ܗ̱ܘܬ܆ ܝܘܩܪܐ ܪܒܐ ܡܬܬܣܝܡ ܗ̱ܘܐ ܥܠ ܩܝ̈ܢܬܐ ܘܛܟܣܝ̈ܬܐ ܕܥܕܬܐ ܘܥܠ ܟܠ ܡܕܡ ܒܙܢܐ ܓܘܢܝܐ. ܐܠܐ ܗܳܫܐܝܬ ܟܠܚܕ ܡܢܢ ܡ̣ܢ ܕܘܟܬܐ ܦܪܝܫܬܐ ܐܶܬܐ ܘܐܬܟܢܫܢܢ ܟܠܢ ܬܚܝܬ ܬܛܠܝܠܐ ܚܕ ܪܘܚܢܝܐ ܐܝܟ ܝܩܪܬܐ ܚܕܐ܆ ܙܳܕܩܝܬܐ ܗ̱ܝ ܕܰܢܙܡܪ ܒܗܝ̣ ܟܕ ܗܝ̣ ܩܝܢܬܐ ܥܠ ܓܘܕܐ. ܐܘܟܝܬ ܩܝ̈ܢܬܐ ܕܥܡܘܪ̈ܝ ܕܝܪܐ ܢܬܠܚ̈ܡܢ ܠܚܕ̈ܕܐ ܘܠܘ ܟܠܚܕ ܢܙܰܡܪ ܘܢܐܡ̇ܪ ܗ̇ܘ ܡܐ ܕܝ̣ܠܦ. ܘܗܟܢܐ ܢܗܘܐ ܒܘ̣ܠܒܠܐ ܘܠܐ ܡܛܟܣܘܬܐ ܒܓܘ̈ܕܐ ܕܕܝܪܐ܆ ܘܫܶܡܥܐ ܠܐ ܒܰܣܝܡܐ ܠܡܗܝ̈ܡܢܐ ܟܕ ܒܨܠܘܬܐ ܡܬܛܝܒܝܢ. ܘܝܕܝܥܐܝܬ ܗܳܘܝܳܐ ܥܣܩܘܬܐ ܠܝ̈ܠܘܦܐ ܕܢܐܠܦܘܢ ܩܝ̈ܢܬܐ ܟܕ ܟܠܚܕ ܒܙܢܐ ܡܕܡ ܐܡ̇ܪ ܘܰܡܩܰܢܩܶܢ. ܡܛܠ ܗܕܐ ܣܒܪܐ ܐܝܬ ܠܢ ܪܒܐ ܕܢܗܘܐ ܕܘܩܐ ܗܢܐ ܡܥܕܪܢܐ ܘܣܳܦܩܐ ܠܡܠܦ̈ܢܐ ܕܕܝܪܐ ܘܠܡܠ̈ܦܢܐ ܐ̱ܚܪ̈ܢܐ ܘܠܟܠ ܐܚܐ ܣܘܪܝܝܐ.
ܡܟܝܠ܆ ܗܐ ܗܫܐ ܫܟܝ̣ܚܐ ܣܝ̣ܡܬܐ ܗܕܐ ܟܘܪܟܡܢܝܬܐ ܠܡܰܢ ܕܰܐܟܝ̣ܦ ܠܗ ܥܠ ܩܝ̈ܢܬܐ ܕܒܝܬ ܓܙܐ. ܘܒܥܳܬܐ ܕܝܠܢ ܡܚܝ̣ܠܬܐ ܡܢ ܟܠ ܫܳܡܘܥܐ ܣܘܪܝܝܐ ܟܕ ܢܗܘܐ ܨܳܐܬ ܥܠ ܕܘܩܐ ܗܢܐ ܕܢܺܐܠܦ ܘܠܐܚܪ̈ܢܐ ܢܰܠܦ ܘܨܠܘܬܐ ܢܣܪܚ ܥܠ ܡܢܳܚ̈ܐ ܕܟܝ̣ܪ̈ܐ ܘܥܠܝܢ ܘܥܠ ܥܢܝܕ̈ܝܢ.
ܡܛܟܣ̈ܢܐ ܘܡܛܝ̈ܒܢܐ
ܪܒܢ ܐܤܛܦܢ ܦܝ̣ܕܢ ܘ ܩ̄ܫ ܐܝܣܚܩ ܐܪܓܘܢ
ܕܝܪܐ ܕܟܘܪܟܡܐ
